خزعبلات مصرية

على راى احمد ، نفسى مفتوحة للرغى النهارده

مممم

دلوقتى زى جميع سيدات المعادى المحترمين (مش شرط) اللى مبيخرجوش بعد الساعة عشرة كنت قاعدة بتفرج على البيت بيتك…وشاء حظى العثر ان يبقى الأخ وزير الخارجية الفاضل بتاعنا بيتحمق على الهواء بسبب حارس الحدود اللى قتله قناص من حماس…طيب…انا مش بحب الراجل ده وبيستفزنى الى اقصى حد لانه بق عالفاضى فى الحق نادراً وبحسه متواطىء كده غالباً…هو عموما مستفز…وعسكرى الحدود الغلبان اللى بيحرس حدودنا مع اخواننا الفلسطينين موضوعه عجيب…ليه قناص من اى نوع حيضرب حارس حدود (يعنى سياسة ومهرجان وقلق) برصاصة فى دماغة؟؟ عجيبة صح؟؟عجيبة اوى مش كده؟؟ بس بما انى مكنتش بتمشى على الحدود يومها وما شفتش مش قادرة افتى بس برضه بما انى لا اثق فى اى اعلام تقريباً لا اصدق القصة دى…كل اللى اقدر اقوله…الله يرحمه وياخدله حقه من الظالم

 

 

بس زى ما مبحبش حد مهم  -المفروض- فى بلدى…صعبان عليا اوى واحد تانى…ساويرس روحه حلوة وذكى جداً جداً وشاطر ومصرى وناجح…صعبان عليا ان شركة حققت نجاح مهم زى موبينيل ممكن تروح منه…ومش فاهمة راح فين ذكاءه لما اتورط فى قصة فرنسا دى…انا فاكرة ايام الماجيستير كان فيه زمايل بيشتغلوا فى موبينيل…ومرة الدكتور سألهم رأيهم لو انتقلت الشركة للفرنسوين…اتنين قالوا حيزعلوا واربعة قالوا يا ريت!!! ما هو الخواجات بيدفعوا اكتر…ممم…اقول ايه؟

 

 

دورت امبارح اون لاين على تكلفة عمليات تدبيس المعدة…الدكاترة اتسرعت يا جدعان!!! بيسألوا الدكتور ليه العملية غاليه اوى كده خاصة ان السمنة مرض بيهدد حياة الناس مش تجميل يعنى…قال…انت عارف يا استاذ الدبوس بكام النهارده…وصل لـ1200 جنيه!!! السعر بالدبوس…لذا فكرت فى طريقة موفرة لسعر العملية…المعدة بتحتاج دبابيس على قد حجمها…يعنى كلما زاد الوزن زادت الدبابيس…الفكرة العبقرية بقى…الواحد يخس عشان معدته تصغر ويحتاج دبوسين تلاتة بدل تسعتاشر!! هىىهىهىهى

 

 

حناكل ايه النهارده…رجع السؤال ده لحياتى اليومية…امى تسالنى اول ما تشوف وشى الصبح وبعدين الولاد يسالونى بالدور…البنت وبعدين الولد…زمان كنت ببصلهم بصة “انت اهبل وانا مالى انا” اما الآن فبما انى من غير شغل امى عملت شيفت لمهام المطبخ ليا…يعنى…دول ولادك…اكليهم…هى مش فاهمة انى بحب اطبخ وبحب اكلى يبسط الناس…بس مش معنى كده ان حياتى تتمحور حول طبق اليوم…وده مالوش اى علاقة انى بحب اتفرج على قناة فتافيت قبل النوم لان لها فعالية منومة اكبر من الادوية…انا باسجل هنا التطور اللغوى اللى حاص فى بيتنا…صباح الخير بقت حناكل ايه…وتصبحوا على خير بقت قناة فتافيت…عيشة يامى يامى خالص

 

اى نعم…وردبرس بيكتب عربى عامى بيئى

Advertisements