اعتقد..عقبالنا..ممكن؟؟

لما شفت الفيديو ده…فيه شعب ثار..شعب فجأة ظهر انه كبير وانه قادر وانه شايف وحاسس وقوى…

كان اول احساس انه: عقبالنا يا رب

بعدين غصيت فى الكلمة لما جه ينطقها لسانى…لانى اعتقد مش واثقة

مش واثقة ان الشعب…كل الشعب…او حتى معظم الشعب…كبير او قادر او شايف او حاسس او قوى

مش واثقة ان اللى فينا كبير هو قادر…او اللى فينا قادر هو قوى او القوى حاسس او شايف…حاسه ان الناس اللى شايلة هم بلدها بجد وايديها فى النار هما قليلين جداً…مش واثقة ان القلة دى تقدر تهز عرش القوة الاكبر…ولو بالعدد…شعبنا الكتير ده تلات ارباعة اما الفقر كسر ظهره وعينه وقلبه اللى بقى متعلق فى ورق البنكنوت بين الموت والحياة… او الغِنَى كاسر احساسه بالحق والعدل والانسانية والحرية والفعالية

الشعب التونسى…اللى كل المصريين كانوا بيتريقوا عليه طول عمرهم…الشعب اللى كنا واصمين ستاته بالعُهر ورجالته بفقدان الهوية وعاملين الموضوع نكتة وضحكة وقفشة…الشعب ده عمل حاجة سحرية…غير متوقعة…صلبة…فعالة…الشعب ده جعل رئيس دولة يهرب…يمشى…يفر…

كان حد فينا يصدق؟؟

نقدر نعمل حاجة؟؟

آه…نقدر…بس يا ترى عايزين نقدر؟؟

قدها؟؟

احنا كشعب ايه اللى شاغلنا عن إعمال الحق؟؟ احوالنا العاطفية؟؟ مين ساب مين ومين حب مين ومين واخد بمبة فى مين بس بيقاوح؟؟ ولا شاغلنا المزيد والمزيد من الجنس باى شكل وباى ثمن؟؟ ولا شاغلنا ازاى نجيب فلوس وازاى نصرف فلوس؟؟ ولا شاغلنا ازاى نعمل دماغ لما بقى معظم الرجالة ونص الستات اما مسطول او بيدور على حاجة تسطله؟؟

 والفئة الساذجة الشقيانة من الشعب لو اتسألت عن منتهى امانيها حتقول: اربى العيال واجهز اخواتى واروح احج انا وامى….ولو سألتها عن التغيير وحال البلد يردوا: هو احنا نفسنا الاسعار تقل شوية والمرتبات تزيد شوية بس ثورة لا…اللى نعرفه احسن من اللى منعرفوش

 

مين اللى يستحق يبقى نكتة؟؟ ايه هو العُهر الحقيقى؟؟ عُهر الشهوة ولا عُهر المقصد والهوية والقيمة؟؟

اعتقد..عقبالنا لما نسمع بلادى بلادى لكى حبى وفؤادى…ممكن؟؟

 

Advertisements

3 thoughts on “اعتقد..عقبالنا..ممكن؟؟

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s