النهارده هو الابد

من الأحاديث المتناقلة أنه إذا جاء يوم جديد يقول للعباد…انا يوم جديد ، عليك شهيد ، إغتنمنى فإنى لا أعود إلى يوم الدين

والحقيقة ان كل لحظة لازم تُغتَنَم وكل لحظة هى فرصة وبداية وميلاد جديد

الحقيقة ان مفيش لحظة زى التانية وكل لحظة بتروح مبترجعش تانى..بس اللحظة عبقرية متجددة بروح جديدة وتاريخ مختلف

وعشان لحظتنا فى يومنا الجديد اللى بيشهد تحول شعب وتحول وطن – هى لحظة غالية جداً…هى لحظة فى روعة أجمل حلم وفى قوة أصلب حقيقة…هى لحظة لازم نركز فيها فى كل لحظة جاية

النهارده الهدف ايه وايه الطريقة

النهارده لازم نشوف الف حقيقة وزى ما نقدنا نظام لازم ننقد نفسنا لان صمتنا واستكانتنا للترويض غذت هذا النظام

النهارده النظام حيكون انا وحيكون منى وليا

النهارده مفيش اتكال على حد يبنى ومفيش نقد لحد غيرى ومفيش مسئول الا نفسى ومع كل ده لازم ايدى تبقى فى ايد كل الناس

انا لوحدها مبقتش مفهومة

لنفسى بس مبقتش مقبولة

رؤيتى وغايتى وانعزالى مبقوش كفاية

لازم نكون..نفكر…نصنع..نقرر…نحافظ..نبنى..نعمر..نربى..نفسنا وولادنا…نخضر…نعلم ونتعلم

لو فاتت عليا الفرصة دى انى اكون،  الكون حيتسغربنى

لو سمحت بإهانة باينة فى نبرة صوت ولا نظرة عين ، الكرامة حتطردنى

إحترامى لازم يزيد لقيمة عمل كل واحد فينا

إحترام شديد مهيب ميخليش مسئول يفكر يقول هات عشان تاخد

إحترام يساوى كنوز تغنى النفوس بكفاية

إحترام للورقة والقلم والختم

إحترام لنجمة ودبور ونسر بحَوِله النهاردة من عدو استعمر أمانى لصديق حيزيد أمانى

التغيير مش أسماء

التغيير مش جتت…جتة تترمى من على كرسى وجتة تتحط

التغيير فكر…فكر القبول برحابة بس كمان بحساب

فكر الثقة المنورة بنظر 6/6

فكر المسئولية اللى لازم تتزرع فيا قبل غيرى

فكر القيمة…قيمة حياتى…قيمة كلمتى…قيمة عمرى وتصرفاتى

قيمة غيرى فى عقله وروحه وانسانية

حرية كاملة …وسع البحور والاقمار والكون…حرية محترمة من الجميع…حرية مسئولة

انا النهاردة عايزة أصدق وناوية أصدق ومصدقة خلاص

انى اقدر واننا حنقدر والكون حيقَدَر 

حخلى بالى من مطبات نظام جديد

من ستاير ممكن تخبى حقايق تانية كتير

من مخالب وحيايا

حنخلى بالنا كلنا…حنقرا العلامات…حنحترم كل رأينا…حنقرر احسن الاختيارات…حننفذ بحب وامانة…مش حنحط قانون…حنعيش قانون

نفسى كل واحد يعرف قد ايه قيمته كبيرة…حرام تروح فى تراب فساد وضياع

لا لمخدر بيذهب واقع مرير…واقعك بايدك فى ثانية يبقى نور

لا لاستسلام لضعف وقهر…قوتك فى دماغك ..قول يا رب وابتدى

لا لتضييع الجهد…لا لغبن وحقد

قلب سليم يقدر يحقق احلام كل الناس…يقدر يسند كل حد عايز مُساندة…يقدر يطَوِّل كل الايادى للسما

حرية…حرية يعنى مسئولية وحب وتنعم فى قيم اروع من اروع حلم

انا مش رومانسية ولا بحلم بارض فاضلة بلا خطية

انا بس شايفة احتمالية وتحقق للاحتمالية

انا حاسة بقدرة سبحانه فيا

حاسة بعظمة سبحانة

حاسة بجلاله

الايمان ايه؟

الايمان تصديق اللى مبتشفوش العين

بس بيحسه القلب وبتروحله الروح وبيخشعله العقل

وربنا عايزنا نعرفه ونحبه ونرتبط بجلاله

وايه قمة الايمان غير انك تعيش بالاحساس ده

وينفع الاحساس ده من غير شغف بدنيا هو خالقها…من غير اعمارها باخلاص هو علمهولنا…من غير منكون رُسُل على قد حالنا

انا لو سيبت نفسى حكتب للابد

بس حان وقت العمل والادب

النهارده…هو الابد

Advertisements

3 thoughts on “النهارده هو الابد

  1. ربنا يحميكم و يحفظكم
    و تصيروا القائد اللي يفتح عيون الناس على كلامك
    فخور بمصر
    انا مصري اليوم
    و بتمنى يرجع اليوم اللي اكون فيه فلسطيني

    Like

  2. Sharifo,
    I really mean it when i say…YOU ARE!
    you have an amazing spirit…seriously, May Allah bless you with the very best and may all free all our countries and help us with the new era.

    Jerusalem,
    wa7ashteeny 🙂
    Allah ye3ein 3ala elly gai oo yebarek in our revolution.
    Bless you mt darling 🙂

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s