رسالة الى تاج راسى

بحبك

مع انك مغيرنى …بس بحبك

مع انك طوق حوالين رقبتى

 ولجام حوالين دماغى

بس بحبك

بستخبى فيك

بدارى جنانى بيك

لاففنى بأمان وحفاظة

وبحبك

أحياناً بزهدك…

بزهدك علشان أشترى عيون الناس

قبول الناس

بزهدك

وبتحرر منك

علشان أتنفس

عشان أحس انى والسما واحد

عشان البحر يغرقنى فيه

عشان احس ان الهوا سكن شعرى وطار بيه

برجعلك بقلب

زى ما بزهدك بقلب

برجعلك واعيطلك تسامحنى

عشان بحبك

ده مش تخلى

ده مش نُكران

ده مش كُفر بيك

ده مش عصيان

ده…مش عارفة ده ايه

 

انا انسانة…زى ما بحبك

ساعات بقلب عليك

او…او بس هو الهوا…والمية…والسما

وشمس حامية ترجع فى عروقى الحياة

وعيون الناس اللى بتحضنى من غيرك

بتلهى بيهم عنك

بس برجعلك

علشان حبيتك

اوي… حبيت سترك…حدودك…

استكانة عفاريتى بيك…استكانة مُريحة أوووووى

بتحبنى وطاير جنبى؟

مسامحنى وحاسس بحبى؟

طب افتكرلى حاجة حلوة

يوم ما اتشتمت بيك

يوم ما اتهجرت ليك

يوم ما اتهمشت عشان جريت عليك

حياة ابوك ما تزعل منى

عشان ساعات بزدريك

افرح

افرح انى مش بنافقك

افرح انى بصدق بحبك…وقت ما بحبك

ووقت الخنقة بعفيك

من لومى وزلتى

ع الاقل انت فى حياتى امانة

مش بخونك ..انا كنت بستسمحك

بستسمحك انساك

واعيش من غيرك

بستسمحك وببعد من غير ما اسيبك 

شايف رجوعى بحب

كان الاجازة من غيرك كانت وحشة

كان من غيرك انا وحدى فى وَحشة

والله بحبك

اقبلنى كما انا

حريتى فى حبك غِنى

حريتى انى اخترتك..بقلبى وبعقلى وبايدى انا

الخيانة مش البُعاد

الخيانة ابقى لازقاك فيا وكرهاك

وانا حباك

تلاتة بالله العظيم حباك

وشرياك

وعايزاك

إيشاربى يا إيشاربى…

سامحنى لو غلطت …شِعرى كله فداك

Advertisements

2 thoughts on “رسالة الى تاج راسى

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s